Lindi në Tiranë Skënder Plasari, aktor, libretist, skenarist. Ka kryer studimet e larta në Institutin e Fizkulturës, më 1963. Mbas sukseseve në fushën e sportit, ku u bë disa herë kampion kombëtar në mundje, në gjimnastikën e veglave, në boks e në atletikë për të cilat ka merituar titujt më të lartë, që nga “Mjeshtër i merituar” e deri tek “Nderi i Sportit Shqiptar”, iu përkushtua artit të skenës dhe të ekranit. E filloi si interpretues dhe shkrues skeçesh të ndryshme për estradë dhe vijoi më vonë si aktor, libretist e skenarist. Në vitet 1959–1979 punoi si aktor dhe akrobat në Teatrin Profesionist të Estradës, Tiranë. Më 1979 filloi punën si pedagog në Institutin e Fizkulturës, pastaj kaloi në Institutin e Lartë të Arteve (sot Akademia e Arteve) si pedagog i lëvizjeve plastike dhe pantomimës. Paralelisht ka interpretuar role karakteresh në filmat artistikë shqiptarë. Suksesi më i spikatur i krijimtarisë së tij mbetet skenari i kinokomedisë së parë shqiptare “Kapedani”, 1972, që pati sukses të bujshëm te shikuesit e shumtë. (Në fotografi: Skënder Plasari)
Teksti: Vikor Gjika
Fotografia: © https://www.kinematografia-shqiptare-sporti.com/skender-plasari-aktor-i-estrades-se-tiranes-libretist-dhe-skenarist-i-filmit/
Përpunim grafik: AHCF
