Në Romë (Itali) u nda nga jeta Kastriot Gjini, kompozitor i njohur shqiptar. Lindi në Tiranë, në vitin 1949. Në moshën 5-vjeçare u aktivizua në Estradën e Gjirokastrës, si fizarmonicist. Kompozimi i parë ishte kënga për pionierë “Fyelli i bariut” (1961), e cila u vlerësua me çmim në Festivalin e Parë të Pionierëve në Tiranë. Studimet në muzikë i zhvilloi në mënyrë autodidakte. Mbaroi Universitetin e Tiranës, dega e anglishtes. Në këto vite Kastriot Gjini krijoi këngë që u vlerësuan me çmime në festivalet kombëtare në Radio Televizionin Shqiptar, si: “Duart e tua”, “Fqinja”, “Sytë e tu” etj. Kastriot Gjini ka krijuar rreth 75 këngë për fëmijë dhe të rritur e muzikë orkestrale. Është bashkautor i muzikës së filmit “Korrierët” (1976). Ai e pasuroi muzikën shqiptare në gjininë e këngës me tingëllime të reja dhe gjetje artistike, sidomos në pikëpamje të melodisë, harmonisë, ritmit dhe tematikës. Këngët e tij spikatën për melodikën e frymëzuar, qartësinë emocionale, tematikën e gjerë e të larmishme si dhe ekspresivitetin. (Në fotografi: Kastriot Gjini)
Teksti: Josif Papagjoni
Fotografia: © https://gjirokastraonline.com/wp-content/uploads/2021/08/28423828_1370927736386689_3590855155384174763_o-1.jpg
Përpunim grafik: AHCF
