Ra heroikisht në luftimet kundër nazistëve gjermanë pranë Morinit, në rrugën Kukës-Prizren, Llambro Andoni, pjesëmarrës i Luftës Antifashiste Nacionalçlirimtare, Hero i Popullit. Lindi në Vuno të Himarës, në vitin 1920. Që nga viti 1942 e shndërroi stanin e tij në bazë për njësitin gueril të bregdetit. Në përbërjen e këtij njësiti mori pjesë në disa aksione kundër pushtuesve e bashkëpunëtorëve të tyre. Anëtar i Partisë Komuniste Shqiptare në prill 1943. Si anëtar shtabi batalioni në Brigadën V Sulmuese (1944) u dallua për aftësi komandimi, sidomos në veprimet luftarake në zonat e Veriut. Ra heroikisht në vitin 1944. (Në fotografi: Llambro Andoni)
Teksti: Fjalor enciklopedik shqiptar – Vëll. 1, Akademia e Shkencave e Shqipërisë, “Kristalina-KH”, Tiranë, 2008, faqe 71.
Fotografia: © Xhoxhi L., arkivi vetjak.
Përpunim grafik: AHCF
