Në Borgo Erizzo (pjesë e Zarës të Kroacisë) doli në qarkullim gazeta shqipe “Zani i Scyptarit”. Qëllimi themelor i kësaj gazete ishte përcjellja e frymës së lëvizjes ideore të Rilindjes Kombëtare Shqiptare, gjë që karakterizonte të gjithë shtypin që u botua në diasporë. Kujtojmë se, nga gazeta e parë e botuar në vitin 1848 deri më 1912, dolën afro 90 gazeta e revista kudo ku ishin ngulimet e vjetra e të reja të shqiptarëve. Vendin e parë në këtë lëvizje kulturore të shtypit, e mbajnë padyshim arbëreshët e Italisë. Në Zarë të Kroacisë, ku jeton komuniteti arbnesh, ka pasur në shekujt e fundit aktivitet të pasur letrar dhe shumë personalitete të shquara të shqiptarisë kanë botuar edhe atje. Ngulimet shqiptare janë vendosur në shekullin XVIII, të shpërngulur kryesisht nga rrethinat e Shkodrës dhe të Ulqinit. Ruajtja e gjuhës shqipe të shkruar ka qenë një sfidë e madhe për këtë komunitet. (Në fotografi: Harta e Mbretërisë së Dalmacisë.)
Teksti: Qendra e Studimeve dhe Publikimeve për Arbëreshët
Fotografia: © https://sq.wikipedia.org/wiki/Mbret%C3%ABria_e_Dalmacis%C3%AB
Përpunim grafik: AHCF
