U nda nga jeta Zihni Sako, folklorist dhe shkrimtar, profesor. Lindi në Gjirokastër. Kreu gjimnazin “Zosimea” të Janinës. Në vitet 1936–1938 ndoqi studimet e larta për filologji klasike në Universitetin e Athinës. Pjesëmarrës i Luftës Antifashiste Nacionalçlirimtare. Pas çlirimit ishte drejtor i shtypit në Ministrinë e Kulturës, nënpresident i Komitetit të Kulturës. Në vitet 1949–1957, punoi në Institutin e Shkencave dhe në Lidhjen e Shkrimtarëve, më pas përgjegjës i sektorit të folklorit në Institutin e Historisë e të Gjuhësisë (1958–1961), drejtor Institutit të Folklorit (1961–1979). Për rreth 30 vjet drejtoi punën për krijimin dhe sistemimin shkencor të arkivit të folklorit. Në vitet 1951–1960, drejtoi dhe mori pjesë në përgatitjen e një varg vëllimesh antologjike me lëndë folklorike. Mbledhës i hershëm i folklorit shqiptar. Redaktor përgjegjës i korpusit “Trashëgimi kulturor i popullit shqiptar”. Është autor i pjesës “Letërsia popullore” në veprën “Historia e letërsisë shqipe” vëllimi I (botim i vitit 1959), si dhe bashkautor në tekstin universitar “Folklori shqiptar” (Tiranë, 1972). Ka qenë redaktor përgjegjës dhe anëtar i redaksisë në shumicën e botimeve të realizuara nga Instituti i Folklorit (sot Instituti i Kulturës Popullore). Nga viti 1966, ka kryesuar komisionin e këngës popullore ballkanike të Shoqatës Ndërkombëtare të Studimeve të Evropës Juglindore. Ndër veprat letrare të tij, janë novela “Bereqeti” (1951), “Ditë të gëzueshme” (1953) dhe mjaft vjersha, sidomos për të vegjlit. Ka qenë deputet në Kuvendin Popullor në disa legjislatura. Ka marrë “Çmimin e Republikës të Shkallës së Parë”. (Në fotografi: Zihni Sako; Dokumenti me propozimin e komisionit për letërsinë, për t’i akorduar Sakos çmimit e tretë të Republikës për veprën e tij letrare “Ditë të gëzuara”.)
Teksti: Fjalor enciklopedik shqiptar – Vëll. 3, Akademia e Shkencave e Shqipërisë, “Kristalina-KH”, Tiranë, 2009, faqe 2292-2293.
Fotografia: © Muzeu Historik Kombëtar
Përpunim grafik: AHCF
