U nda nga jeta në Peruxhia të Italisë patrioti i shquar i kombit tonë, Ismail Qemali. Gjatë gjithë jetës së tij ai punoi dhe u përpoq për lirinë dhe pavarësinë e atdheut. Ishte midis atdhetarëve të shquar që formuluan 12 kërkesat drejtuar qeverisë turke për dhënien e një autonomie territoriale dhe administrative për të gjitha trojet shqiptare. Ismail Qemali luajti një rol të shquar në shpalljen e pavarësisë së Shqipërisë. Në prag të kësaj ngjarjeje të madhe historike, ai udhëtoi nëpër Evropë duke marrë kontakte me shtetarë, diplomatë të huaj dhe me kolonitë shqiptare të mërgimit për parapërgatitjen e kushteve të nevojshme. Më pas, bashkë me përfaqësues të krahinave të ndryshme të vendit, erdhi në Vlorë, ku kryesoi Kuvendin Kombëtar që shpalli pavarësinë e Shqipërisë. (Në fotografi: Ismail Qemali)
Teksti: Fjalor enciklopedik shqiptar – Vëll. 3, Akademia e Shkencave e Shqipërisë, “Kristalina-KH”, Tiranë, 2009, faqe 2900-2903.
Fotografia: © Kadiu A., Arkivi vetjak
Përpunim grafik: AHCF
