Në Tiranë u nda nga jeta Mirash Ivanaj, veprimtar, drejtues dhe organizator reformator i arsimit kombëtar, Mësues i Popullit. Lindi në fshatin Bekaj, në Triesh të Malësisë së Madhe, në vitin 1891. Kreu gjimnazin e Pozharevacit (Serbi) dhe vazhdoi studimet për letërsi-filozofi e për drejtësi në Universitetin Mbretëror të Romës. Fillimisht punoi në Shkodër, si publicist e avokat. Më pas si mësues e drejtor i Gjimnazit Shtetëror të Shkodrës, mësues në Gjimnazin e Tiranës dhe ministër i Arsimit (1933–1935). Në krye të Ministrisë së Arsimit filloi dhe drejtoi reformën arsimore të vitit 1933, me anën e së cilës i shtetëzoi, kombëtarizoi e laicizoi shkollat shqiptare; plotësoi tekstet e përmirësoi programet mësimore; riparoi lokalet shkollore e forcoi disiplinën në shkollë etj. Ishte anëtar e kryetar i Këshillit të Shtetit (1936–1939), por pas pushtimit fashist të Shqipërisë, emigroi në Turqi. Pas çlirimit u kthye në atdhe, ku regjimi komunist e dënoi me 7 vjet burg. U nda nga jeta pas gjashtë vjetësh, në burg. Është dekoruar me urdhrin “Nderi i Kombit” (2003). (Në fotografi: Mirash Ivanaj)
Teksti: Fjalor enciklopedik shqiptar – Vëll. 2, Akademia e Shkencave e Shqipërisë, “Kristalina-KH”, Tiranë, 2008, faqe 1055.
Fotografia: © https://ivanaj-foundations.org/blog/2013/09/13/martin-and-mirash-ivanaj/#iLightbox[gallery-1]/12
Përpunim grafik: AHCF
