Në Tiranë lindi Skënder Sallaku, aktor i humorit, Artist i Popullit. Kreu Institutin e Lartë të Kulturës Fizike “Vojo Kushi”, por u bë i njohur me talentin e tij të veçantë në gjinitë e humorit dhe u aktivizua si aktor profesionist në Estradën e Tiranës (1956). Ka luajtur mbi 1000 role nga më të ndryshmet në estradë. Galeria e figurave të tij është shumë e pasur. Një përmbledhje me disa nga rolet më të spikatura e ka interpretuar edhe në dy filmat: “Estrada në ekran” (1968) dhe “Kur hiqen maskat” (1975). Ka luajtur edhe në disa komedi të njohura, si te “Borgjezi fisnik”, e Molierit (Zhurdeni), tek inskenimi i romanit “Don Kishoti”, i Servantesit (Sanço Pança), dhe në kinokomeditë “Gjuetia e fundit” (1992), “Revolja e humbur” (1994), “Oreksi i madh” (1996) etj. Dallohej për mimikë të zhvilluar, sidomos të syve; zotëronte një plastikë të zhdërvjelltë prej akrobati, madje ka luajtur edhe si akrobat e si kloun i cirkut. Për këtë ka kryer një specializim njëvjeçar në Kinë (1960–1961). Me të folurit e tij karakteristik, gjithashtu me mjeshtërinë për rolet komike, Skënder Sallaku u bë një nga aktorët e dashur të humorit në Shqipëri. Skënder Sallaku ka qenë kampion kombëtar i mundjes në peshë 57 kg (1959, 1960). U nda nga jeta në Tiranë, në vitin 2014. (Në fotografi: Skënder Sallaku)
Teksti: Fjalor enciklopedik shqiptar – Vëll. 3, Akademia e Shkencave e Shqipërisë, “Kristalina-KH”, Tiranë, 2009, faqe 2295.
Fotografia: © Agjencia Telegrafike Shqiptare
Përpunim grafik: AHCF
