Lindi në Shkodër Drane Xhaja, aktore e humorit. Mbaroi liceun artistik “Jordan Misja” më 1978 dhe studimin njëvjeçar për aktore pranë Teatrit Popullor më 1979, vit kur filloi punë në Estradën e Shkodrës. Është aktore me prezencë skenike, e hijshme, e sigurt në veprim, me një diksion të pastër dhe kumbues. Anon nga një humor plastikisht elegant, ku ndihet kujdesi për të ravijëzuar figura grash “fisnike”, “qytetare”, snobe, sikundër edhe fshatarka llafazane, disi të pagdhendura që shtiren si të mençura etj. Ka lënë mbresa me disa karaktere të mjediseve qytetare shkodrane a përreth, si me skeçet apo edhe me komeditë e shkurtra. Në një pjesë të madhe në premiera të shumta ka luajtur rolin e prezantueses, duke spikatur për të folurën e bukur, hirin dhe prezencën skenike. (Në fotografi: Drane Xhaja)
Teksti: Josif Papagjoni
Fotografia: © https://www.ekskluzive.al/sot-eshte-dhe-ditelindja-e-aktores-se-humorit-shkodran-drane-xhaj-dhe-i-urojme-te-festoi-sa-me-shume-vite-te-lumtura/
Përpunim grafik: AHCF
