Në Shkodër lindi Bep Jubani, arkeolog, studiues i prehistorisë. Studimet e larta për arkeologji i kreu në Shën Petërburg. Në fillim të viteve ’60 të shekullit XX drejtoi gërmimet në qendrën e fortifikuar parahistorike të Gajtanit. Në këto vite interesi kërkimor i tij përfshiu edhe disa vendbanime të Shqipërisë Juglindore, si ai i Kamnikut në Kolonjë dhe, veçanërisht, varrezat tumulare të Shqipërisë Veriore, si ato në Krumë, Çinamak, Kënetë (të Kukësit), Shkrel dhe Shtoj. U arrestua më 1976, dhe më 29 korrik të po atij viti, me vendim nr. 58, Gjykata e Rrethit të Tiranës e deklaroi fajtor për “agjitacion e propagandë” dhe vendosi mbylljen e të pandehurit në një institucion mjekësor për kurim të detyruar. U nda nga jeta në Tiranë, në vitin 2014. (Në fotografi: Bep Jubani)
Teksti: Fjalor enciklopedik i viktimave të terrorit komunist – Vëll. IV, “West Print”, Instituti i Studimit të Krimeve dhe Pasojave të Komunizmit, Tiranë, 2015, faqe 78.
Fotografia: © https://www.pressreader.com/albania/gazeta-shqiptare/20140110/281870116286326
Përpunim grafik: AHCF
