Lindi në Tiranë, Saimir Kumbaro, regjisor, aktor. Mbaroi Institutin e Lartë të Arteve, degën e dramës, më 1969. Filloi punën në kinostudio si asistent regjisor, duke u aktivizuar paralelisht si aktor në filma të ndryshëm. Mbas xhirimeve me sukses të disa filmave dokumentarë, iu besua realizimi i filmit artistik me dy seri “Rrugicat që kërkonin diell”, 1975, film që u shqua sidomos për dinamikën dhe emocionet e skenave masive. Në vitet në vazhdim iu përkushtua filmave dokumentarë televizivë, midis të cilëve shquhet seriali prej mbi 100 filmash, me titull “Heronjtë e Shqipërisë”, i realizuar në vitet 2000–2004. Në këtë serial gjurmohen me sukses njerëz të fushave të ndryshme të jetës shqiptare me fate të veçanta. Shquhet për karakterin kërkues dhe improvizues në krijimtarinë e tij, që ka ecur gjithmonë në rritje. (Në fotografi: Saimir Kumbaro)
Teksti: Viktor Gjika
Fotografia: © https://digital.library.ucla.edu/catalog/ark:/21198/z11s0xsm
Përpunim grafik: AHCF
