Forcat serbe më 14 maj 1999, pas fshatit Pavlan, e vazhduan aksionin në drejtim të fshatit Zahaq. Pasi rrethuan fshatin, forca të shumta policore dhe ushtarake hynë shtëpi më shtëpi dhe, duke shtënë me armë, i detyruan banorët të tubohen në qendër të fshatit. Masën e tubuar të fshatarëve, të ngarkuar në kamionë, traktorë dhe makina e detyruan të niset në drejtim të Pejës. Në rrugë e sipër policia ndali kolonën, nga e cila mori 19 meshkuj dhe i ekzekutuan pa ndonjë shkak. Kufomat e të ekzekutuarve gjatë natës u dërguan në drejtim të panjohur. Emrat e disa prej të vrarëve të këtij fshati ende gjenden në listën e personave të zhdukur. (Në fotografi: Varrezat e Pavlanit dhe Zahaqit.)
Teksti: Fjalori enciklopedik i Kosovës – Vëll. II, Akademia e Shkencave dhe e Arteve e Kosovës, Prishtinë, 2018, faqe 1062.
Fotografia: © https://oxygenpress.info/2020/05/14/perkujtohen-masakrat-e-qyshkut-pavlanit-zahaqit-dhe-llabjanit/
Përpunim grafik: AHCF
