U var në burgun e Gjirokastrës Bule Naipi, pjesëmarrëse e Luftës Antifashiste Nacionalçlirimtare, Heroinë e Popullit. Lindi në Gjirokastër, në vitin 1924. Anëtare e Partisë Komuniste Shqiptare menjëherë pas themelimit të saj. Mori pjesë në demonstrata antifashiste; punoi për përhapjen e ideve të Luftës Antifashiste Nacionalçlirimtare në popull e veçanërisht në radhët e të rejave e grave të Gjirokastrës, Libohovës e Konispolit. Për një kohë punoi në zonën e çliruar të Kurveleshit. Ishte një ndër organizatoret e grevës së bukës në Gjirokastër (1943). U kap në befasi nga forcat naziste dhe veglat e tyre, në korrik 1944, u torturua në burgun e Gjirokastrës dhe u var po atë muaj. (Në fotografi: Bule Naipi)
Teksti: Fjalor enciklopedik shqiptar – Vëll. 3, Akademia e Shkencave e Shqipërisë, “Kristalina-KH”, Tiranë, 2009, faqe 1806–1807.
Fotografia: © https://en.wikipedia.org/wiki/Bule_Naipi
Përpunim grafik: AHCF
